என்ன என்ன பாவங்களோ..?

என்ன என்ன பாவங்களோ..?

கம்பராமாயணத்தில், ராமனை காட்டிற்கு அனுப்பி விட்டு தான் பட்டத்தை ஏற்றுக் கொண்டால் தான் எப்படிப்பட்ட பாவியாவேன் என்று கௌசல்யாவிடம் கூறும் பரதன் என்னென்ன பாவங்கள் இருக்கின்றன என்று ஒரு லிஸ்ட் கொடுக்கிறான்.

தாய் பசியால் துடிக்கும் பொழுது உணவு கொடாது, தான் மட்டும் உண்டவனும், போரில் தலைவன் அழியுமாறு விட்டு விட்டு ஓடியவனும் வீழும் நரகத்திலே நானும் வீழ்வேன்.

தன் காலில் அடைக்கலம் என்று வீழ்ந்தவரை காப்பாற்றினால் தனக்கு  ஏதேனும் தீங்கு வருமோ? என்று அஞ்சி அவர்களை பகைவரிடம் காட்டிக் கொடுத்த மூடனும், நாளும் செய்ய வேண்டிய கடமைகளை செய்ய மறந்தவனும் வீழும் மீள முடியாத நரகத்திலே நானும் வீழ்வேன்.

பொய் சாட்சி கூறியவனும், போரினுக்கு பயந்து ஓடியவனும், காப்பாற்றுமாறு தந்த அடைக்கல பொருளை தராமல் தனக்கே வைத்துக் கொண்டவனும் நிலை தளர்ந்து மெலிந்தவரை வருத்தியவனும் அடையும் நரகத்தை யான் சேர்வேன். 

வேத நெறி வாழும் அந்தணர்கள் வாழும் இடத்தை நெருப்பால் எரித்தவனும், தம் மக்களையே கொன்றவனும், பொய்யான வழக்கு தொடுத்தவனும், தெய்வங்களை பழித்தவனும் செல்லும் கொடிய நரகம் சேர்வேன். 

கன்றுக்கு பால் இல்லாமல் ஒட்டக் கறந்து உயிர் விடுமாறு செய்கிறவனும், பிறர் பொருளை கொடாமல் மறைத்து வைத்துக் கொள்கின்றவனும், செய் நன்றியை மறந்து விடுகிற நாவுடையவனும் அடையும் நரகத்தை அடைவேன். 

தன்னுடன் வரும் பெண்டிரை தீயவர்கள் பிடித்து கேடு செய்யக் கண்டும், அவர்களை விடுவிக்க முயலாமல் தன்னுயிரை காத்துக் கொள்ள தப்பி ஓடிப் போனவனும், தன் பக்கத்தில் உள்ளவர் பசியால் வாடும் பொழுது கொடாமல், தான் மட்டுமே உண்டவனும் செல்லும் நரகத்திற்கு நானும் செல்வேன்.

*உயிர்களை கொன்று தின்னும் ஆசையை உடையவனும், அறநெறியை விட்டு தீய வழியில் பொருள்களை அடைய விரும்பிய மன்னவனும் அடையும் நரகத்தை நானும் அடைவேன். 

சிறந்த குடியில் பிறந்தவரை காலங்கள் உண்டாக்கி பழி கூறியவனும், விலை குறைவான காலத்தில் கிடைக்கும் நல்ல உணவை எளியவர் உண்ண முடியாதபடி செய்தவனும், நல்ல உணவை மிகுந்த மணமும்,சுவையும் உடையதெனக் கூறி, பக்கத்தில் இருப்பவர் நாவில் ஊறுன்படி செய்து, தான்  ஒருவனாகவே உண்பவனும், அடையும் நரகத்தை அடைவேன்.

தன் நாட்டு மக்கள், பிற நாட்டில் இருந்து வந்து தங்கிய மக்கள், வாணிகத்தின் பொருட்டாக வந்துள்ள மக்கள், என்ற மூவகையினரும் உள்ள நாட்டின் மீது பகைவன் படை எடுத்து வந்து பொழுது, எதிர்த்து போரிடாமல் பயந்தவன், அல்லது ஒளிந்து கொண்ட மன்னவன் அடையும் நரகத்தை நான் அடைவேன். 

கன்னிப் பெண்ணைக் கெடுக்க கருதியவனும், குருவின் பத்தினியை அடைய விரும்பியவனும், கள்ளினை குடித்தவனும், திருட்டினை விரும்பியவனும் செல்லும் நரகத்திற்கு யானும் செல்வேன். 

உண்ணத்தகாத உணவுகளை ஆராயாமல் நாய் போல் உண்பவனும், ஆண் போல் வீரமும், பெண் போல் நாணமும் இல்லாத இவன் யார் என மற்றவர்  இகழ்ந்து கூறவும் நாணாதவனும், கேடு செய்பவனுக்கு நரகம் உண்டு எனும் வேத மொழியைப் பேணாமல் புறம் விடுப்பவனும், மற்றவரின் குற்றங்களையே எப்போதும் கூறித் திரிபவனும் அடையும் கதியை நானும் அடைவேன். 

தன்னிடம் கொடுக்கத்தக்க பொருள் இருந்தும்,அதைக்கேட்டு வந்த இரவலர்க்குத் தராமலும், இல்லை எனக் கூறாமலும், "இன்று வா,நாளை வா" எனப் பல நாளாக அலைய வைத்து வருந்தச் செய்த அறிவிலா மூடன் அடையும் நரகத்தை நானும் அடைவேன். 

வாரியார் சுவாமிகள் இதைக் கூறும் பொழுது, இறந்து போன கன்றுக்குட்டியின் உடலில் வைக்கோலை அடைத்து தாய்ப் பசுவை ஏமாற்றி பால் கறப்பவன் செல்லும் நரகத்திற்கு நானும் செல்வேன், உணவு பொருள்களில் கலப்படம் செய்பவன் செல்லும் நரகத்திற்கு நானும் செல்வேன், உணவுப் பொருள்களை விற்கும் பொழுது எடையில் ஏமாற்றுகிறவன் செல்லும் நரகத்திற்கு நானும் செல்வேன் என்று ராமாயண காலத்தில் இல்லாத கலி கால குற்றங்களையும் சேர்த்துக் கொள்வார். இப்போது அவர் இருந்திருந்தால் வாட்ஸாப்பில் வதந்திகளை பரப்புகிறவன் செல்லும் நரகத்திற்கு செல்வேன் என்று ஊடக குற்றங்களையும் சேர்த்துக் கொண்டிருப்பார்.  

*எஃகுஎறி செருமுகத்து ஏற்ற தெவ்வருக்கு

ஓஃகினன்,உயிர் வளர்த்து உண்ணும் ஆசையான்

அஃகல் இல் அறனெறி ஆக்க்கியோன் பொருள்

வெஃகிய மன்னன் வீழ் நரகின் வீழ்க யான்

ஆய்த எழுத்திலேயே இத்தனை வார்த்தைகளை அடுக்கியிருக்கும் கம்பனின் புலமை வியக்க வைக்கிறது.