தர்பார்(திரைப்பட விமர்சனம்)

தர்பார்

இந்த படத்திற்கு என்ன விமர்சனம் எழுதுவது? ரஜினியை முன்னிறுத்தி ஏ.ஆர்.முருகதாஸின் தர்பார். அதில்  நிவேதா தாமஸ், யோகி பாபு, சுனில் ஷெட்டி, அனிருத், நயன்தாரா என்று பலரும் அங்கம் வகித்திருக்கிறார்கள்.

சும்மா சொல்லக்கூடாது ரஜினி அசத்துகிறார். எழுபது வயதா இந்த மனிதருக்கு என்று நம்பவே முடியவில்லை.

நம்பிக்கை நட்சத்திரமாக ஜொலிப்பவர் நிவேதா தாமஸ். (பாபநாசத்தில் கமலின் மூத்த மகளாக வந்தவராமே?) யோகி பாபு முதல் பாதியில் ரஜினியை கலாய்த்து கலகலப்பூட்டுகிறார். இடைவேளைக்குப் பிறகு என்ட்ரி கொடுக்கும் சுனில் ஷெட்டி பெரிதாக செய்யப் போகிறார் என்று நினைக்கிறோம். ம்ஹும்!

காதில் பஞ்சு வைத்துக் கொண்டால் தேவலாம் போல் அனிருத்தின் இசை அலறுகிறது. ஆனால் இந்த படத்திற்கு இது தேவைதான், இல்லாவிட்டால் எடுபடாது என்கிறார்கள். பாடல்கள் என்று ஏதோ வருகிறது. அவற்றின் வரிகள் காதில் நுழைந்தால்தானே மனதில் நுழையும்.

திருமண வயதில் பெண்ணை வைத்துக் கொண்டிருக்கும் ரஜினிக்கு ஜோடியாக நடிப்பது நயன்தாராவின் இமேஜுக்கு சரி படாது என்பதாலோ என்னவோ, ரஜினிக்கு நயன் ஜோடிதான், ஆனால் ஜோடி இல்லை என்பது போல் அமைத்திருக்கிறார்கள்.  ஆனால் ஒரு பாடலில் ரஜினிக்கு இணையாக ஸ்டைல் காட்டி தான் சூப்பர் ஸ்டாரினி என்று நிரூபித்திருக்கிறார். அடுத்த படத்தில் ரஜினி ஜோடி இல்லாமல், அல்லது, தன் வயதிற்கேற்ற ஜோடியோடு நடிப்பார் என்று எதிர்பார்க்கலாம்.

போலீஸ், அதுவும் கமிஷனர் என்கிறார்கள் தலை முடியை ட்ரிம் பண்ணிக்கொள்ள வேண்டாமா? க்ளீன் ஷேவ்டாக இருக்க வேண்டாமா? ரஜினி சிறையில் இருக்கும் கைதிகளுக்கு செல்போன் கொடுப்பது வில்லனின் நண்பருக்கு எப்படி தெரிய வந்தது?  என்ற கேள்விகள் எல்லாம், வீட்டில் வந்து உட்கார்ந்து யோசிக்கும் பொழுதுதான் தோன்றுகிறது. தியேட்டரில் எதுவும் தோன்றவில்லை. வெளியே வரும்பொழுது 'சும்மா கிழி' என்றுதான் சொல்லத் தோன்றுகிறது.

குப்பத்து ராஜா என்று ஒரு ரஜினி படம் எழுபதுகளின் இறுதியில் வந்தது. டி.ஆர்.ராமண்ணா இயக்கம். அந்த படத்திற்கு குமுதத்தில் 'என்னவோ நினைச்சுகிட்டு உள்ளே போனோம், எதையோ கலக்கி கொடுத்தாங்க, எல்லாம் மறந்து விட்டது' என்று விமர்சனம் எழுதியிருந்தார்கள். இந்தப் படத்திற்கும் அதேதான். புதிய மொந்தையில் பழைய கள்ளாக இருக்கலாம். இருந்து விட்டு போகட்டுமே,  செம போதை!