நம்புவதே வழி

நம்புவதே வழி   

21 நாட்கள் ஊரடங்கு உத்தரவு. அத்தியாவசிய பொருள்கள் கிடைக்கும் என்கிறார்கள். ஆனாலும் மக்கள் மனதில் ஒரு பீதி. இதையெல்லாம் பார்க்கும் பொழுது இப்படி பீதியூட்டிய வேறு சில தருணங்கள் நினைவுக்கு வந்தன.

1990 ஆகஸ்ட் மாதம் இந்தியாவிலிருந்து மஸ்கட் வந்திருந்த ஒரு நண்பரின் பெற்றோர்களைக் காண புறப்பட்டோம். அவர்களுக்காக பழங்கள்  வாங்க எங்கள் வீட்டிற்கு எதிரே இருந்த சூப்பர் மார்க்கெட் சென்ற பொழுது எல்லா சாமான் களும் கடையில் இருந்தன. நண்பரின் வீட்டில் இருந்த பொழுது, பிபிசியில் செய்தி கேட்ட நண்பர் குவைட்டை சதாம் ஹுசைன் பிடித்து விட்டதாக கூறினார். பக்கென்றிருந்தது.  வீட்டிற்கு திரும்பி சாமான்கள் வாங்கலாம் என்று சூப்பர் மார்க்கெட் சென்றால், கடை மொத்தமும் காலி. இருந்த அரிசியை வாங்கிக் கொண்டு வந்தோம். மறு நாள் அலுவலகத்தில் சிலர் தாங்கள் புதிய பெரிய குளிர்சாதன பேட்டி வாங்கி அதில் மளிகை பொருள்கள், மற்றும் காய்கறிகளை வாங்கி நிரப்பி விட்டதாக கூறினர். நல்ல வேளை அரசாங்கம் உடனே நடவடிக்கை எடுத்து பொருள்களை வாங்கி பதுக்குவோர் மேல் கடுமையான நடவடிக்கை எடுக்கப் படும் என்று எச்சரித்ததால் நிலைமை சீர் பட்டது. அப்போது சிலர் பயந்து கொண்டு வேலையை விட்டு இந்தியா திரும்பினர்.

பத்து வருடங்களுக்கு முன்பு கோணு புயல் ஓமானை தாக்கி பலத்த சேதத்தை உண்டாக்கியது. அப்போது குடி நீருக்கு கடும் பற்றாக்குறை ஏற்பட்டதாம். அந்த பயத்தில் அடுத்த வருடம் அதே சமயத்தில் மீண்டும் கோணு புயல் மாதிரி ஒரு புயல் ஓமானை தாக்கப் போகிறது என்னும் வதந்தி பரவி மக்கள் ஹைபர் மார்க்கெட்டுகளில் இருந்த குடிநீர் பாட்டில்களை அள்ளிச் செல்ல, அரசு  எச்சரித்து  நடவடிக்கை எடுத்ததால் சகஜ நிலைமை தொடர்ந்தது.

என்னுடைய நினைவு சரியாக இருக்குமென்றால் 1979 ஆம் வருடம் ஸ்கை லாப் என்னும் விண்கலம் அல்லது செயற்கை கோள் தன்னுடைய பாதையில் இருந்து விலகி பூமியை நோக்கி விரைந்து வந்து கொண்டிருக்கிறது, அது இந்தியாவிலோ, இலங்கையிலோதான் விழும். விழும் இடம் கடும் பாதிப்பிற்கு உள்ளாகும் என்னும் பீதி கிளம்பியது. திருச்சிக்கு அருகில் ஏதோ ஒரு கிராமத்தில்  இருந்த மக்கள் எப்படியும் ஸ்கைலாப் விழுந்து சாகப் போகிறோம், எனவே இருக்கும் பொழுது சந்தோஷமாக இருந்து விடலாம் என்று தங்களிடம் இருந்த கோழி, ஆடு எல்லாவற்றையும் அடித்து விருந்து வைத்து சாப்பிட்டு விட்டனர் என்று செய்தி வந்தது. ஆனால் அந்த பொல்லாத ஸ்கை லாப் அவர்களை ஏமாற்றி விட்டது.

என்னுடைய அப்பா,அம்மா திருமணம் நடந்த காலம் இரண்டாம் உலகப் போர் நடந்து கொண்டிருந்த காலகட்டம் என்றும் அப்போது பொருள்களுக்கு கடும் தட்டுப்பாடு நிலவியது, கெஸ்ட் கண்ட்ரோல் இருந்தது அதனால் சாப்பிட்ட இலைகளை தெருவில் போடாமல் குழி தோண்டி புதைத்தார்கள் என்று எங்கள் அம்மா கூறியிருக்கிறார். பித்தளை பாத்திரங்கள் கூட கும்பகோணத்தில் இருந்த வைதீகர்கள் வீட்டிலிருந்துதான் வாங்கினார்களாம்.  திருமண பத்திரிகையில் தங்கள் வரும்பொழுது தங்கள் ரேஷனை கொண்டு வரவும் என்று அச்சிடுவார்களாம்.

இப்போது சிலர் திருமணத்தை ஒத்தி வைத்திருக்கின்றனர். என் தோழி அவளுடைய சகோதரியின் மகனின் திருமணத்தை குறித்தபடி வீட்டோடு நடத்தியதாக வாட்ஸாப்பில் புகைப்படத்தோடு செய்தி அனுப்பியிருந்தாள். 21 நாட்களுக்குள் நிலைமை கட்டுக்குள் வந்து, சீரடைய வேண்டும் என்று கடவுளை வேண்டுவதைத் தவிர வேறு வழி இல்லை.     

நம்பிக்கையை விதைக்கும் பாரதியின் பாடலை திருமதி.எம்.எஸ். அவர்களின் பேத்தி ஐஸ்வர்யா குரலில் கேட்கலாம்.