விடுமுறை விளையாட்டுகள்

 விடுமுறை விளையாட்டுகள் 

இப்போது லாக் அவுட் பீரியட். எல்லோரும் வீட்டில் இருக்க வேண்டிய நிர்பந்தம். இந்த வருட கோடை  விடுமுறையை  வீட்டிற்குள்ளேயே கழிக்க வேண்டிய நிர்பந்தம் குழந்தைகளுக்கு. இல்லாவிட்டால் அவர்களை ஏதாவதொரு சம்மர் வகுப்பில்  சேர்த்து விட்டிருப்பார்கள். 

எங்கள் காலத்தில் கோடை வகுப்புகள் கிடையாது. பெரும்பான்மையான குழந்தைகள் தாத்தா,பாட்டி வீட்டிற்கு, அதாவது கிராமத்திற்கு அனுப்பப் படுவார்கள். அல்லது நாம் வீட்டிற்கு வரும் உறவினர்களோடு நேரத்தை கழிப்போம்.

காலையில் பழையது பிசைந்து போடப்படும். தொட்டுக்கொள்ள சின்ன வெங்காயம், அல்லது மாவடு, மாங்காய் தொக்கு, ஆவக்காய். அதன் பிறகு மதியம் சாப்பிடும் வரை எங்கள் நேரம்தான். மதிய சாப்பாட்டிற்குப் பிறகு பெரியவர்கள் சற்று தலையை சாய்க்க, நாங்கள் கல்லாங்காய், புளியங்காய், பல்லாங்குழி, தாய கட்டம், கேரம், வீட்டு பெரியவர்களுக்குத் தெரியாமல் சீட்டாட்டம்(ரம்மி, ஆஸ், ட்ரம்ப்), மாலை முழுவதும் தெருவில் விளையாட்டு என்றுதான் பொழுது கழியும்.

வீட்டில் விளைந்த புளியங்காய்களை வெயிலில் காய வைத்து ஒரு சிறு சுத்தியலில் விளக்கெண்ணெய் தடவிக் கொண்டு லேசாக தட்டினால் புளியங்கொட்டை வெளியே வந்து விடும். அவைகளை கூறுகளாக பிரித்துக் கொள்ள வேண்டும். (ஒரு கூறில் அறுபது நான்கு காய்கள்.) அந்த காய்களை தரையில் கொட்டி, கையில் இருக்கும் புளியம் விதைகளில் ஒன்றை மேலே தூக்கிப் போட்டு, அது கீழே வருவதற்குள்  கீழே  இருக்கும்  காய்களுள் ஒன்றையோ, பலவற்றையோ அருகில் இருக்கும் காய்கள் அசங்காமல் எடுக்க வேண்டும்.  கையில் ஏழு காய்கள் கண்டிப்பாக இருக்க வேண்டும். எட்டு காய்கள் சேர்ந்து விட்டால்  அதை கீழே வைத்து விடலாம். சில எக்ஸ்பர்ட்டுகள் நிறைய காய்களை கையில் வைத்துக் கொண்டு  அத்தனையையும் மேலே தூக்கிப் போட்டு பிடித்து விளையாடுவார்கள். 

அதை தவற விட்டாலோ, கீழே ஏதாவது காய் நகர்ந்து  விட்டாலோ  எல்லா  காய்களையும் கீழே போட்டு விட வேண்டும்.  யார் நிறைய கூறுகள்  எடுக்கிறாரோ அவரே வெற்றி பெற்றவர். 

இதில் திறமை இல்லாதவர்கள் புளியம் விதைகளை வைத்துக் கொண்டு ஒத்தையா? ரெட்டையா? பம்பையா? பரட்டையா? விளையாடுவோம். அதில் புளியம் விதைகளை தரையில் பரப்பி வாயால் மூன்று முறை ஊத வேண்டும்.  அப்போது வெளி வரும் காய்களை மற்ற காய்கள் அசங்காமல் சேகரித்துக் கொள்ள  வேண்டும். பின்னர் அதிலிருந்து குறிப்பிட்ட அளவு காய்களை அடுத்தவருக்கு காட்டாமல் எடுத்து கையில் மூடி வைத்துக் கொண்டு ஒத்தையா?ரெட்டையா? பம்பையா?பரட்டையா? என்று கேட்க வேண்டும். அடுத்த ஆசாமி கணித்து சொல்ல வேண்டும். ஒத்தை என்றால் காய்கள் ஓற்றைப் படையில் இருக்கிறதா? என்றும் ரெட்டை என்றால் ரெட்டைப் படையில் இருக்கிறதா? என்றும் பாம்பை என்ற்றால் காய் இல்லாத வேறு பொருள் உதாரணமாக ஒரு பேப்பர் துண்டு, அல்லது கல் இப்படி, பரட்டை என்றால் வெறும் கை. அவர் சரியாக கணித்து விட்டால்  கையில் இருக்கும் காய் அவருக்கு, தவறாக கணித்தால் அதே அளவு காய்களை நமக்குத் தர வேண்டும். அதிகம் புளியங்காய்களை சேர்ப்பவரே வெற்றியாளர்.

மேற்சொன்னவை மதிய நேர விளையாட்டுகள். மாலையில்  ஐ ஸ்பை,  கொக்கோ,நொண்டி, பாண்டி  என்று விளையாடுவோம். இவையெல்லாம் எட்டாம் வகுப்பு வரைதான். அதன் பிறகு கிராமம் அலுத்து விட்டது. அங்கு விடுமுறைக்கு வரும் தோழர்கள் குறைந்து விட்டார்கள்.   

புளியங்காய், கல்லாங்காய் பல்லாங்குழி போன்றவை சாத்வீக  விளையாட்டுகள்தான் (தோற்றுப்போனவரை உட்கார வைத்து "சோபான சொக்கப்பான, ஊரான் வீட்டுக்கு போவான, ஊச வடைய தின்பான" என்று கலாட்டா செய்யும் லேசான வன்முறை இருந்தாலும்) . சீட்டாட்டமும், தாய

கட்டமும்  இருக்கிறதே...  சண்டை இல்லாமல்  சுமுகமாக  முடிந்ததாக  வரலாறே இல்லை. 

அநேகமாக எல்லா கோடை விடுமுறைகளிலும்  'பொன்னியின்  செல்வனும், அப்புசாமி கதைகளும் படித்திருக்கிறேன். படிக்க வேறு எதுவும் கிடைக்காத பொழுது தாத்தா வைத்திருந்த பெரிய  எழுத்து பக்த விஜயம் படித்தேன். காலையும் மாலையும் சாய் பஜன் கூட செய்தோம். 

இந்தக் கால குழந்தைகளின் அனுபவம் வேறு. அதை  அவர்கள் எழுதும் பொழுது தெரிந்து கொள்ளலாம்.