கொரோனா பயங்கள் தேவையா?

கொரோனா பயங்கள் தேவையா?

நான் பிறந்ததும் இதே போல் ஒரு சார்வரி வருடத்தில்தான். அந்த வருடத்திலும் இப்படி ஏதாவது பாதிப்பு இருந்ததா? என்று என் பெரிய அக்காவிடம் கேட்டேன்.
என் பெரிய அக்கா என்னைவிட பதினோரு வருடங்கள் மூத்தவர். அதனால்  அவருக்கு  தெரிந்திருக்க வாய்ப்பு உண்டே. அவர்," நீ பிறந்த வருடம் இப்படி எதுவும் இல்லை, ஆனால் அதற்கும் முந்தைய சார்வரி வருடத்தில் அதாவது நூற்றி   இருவது  வருடங்களுக்கு முன்பு, காஞ்சி  மடத்தின்   மஹா பெரியவர் பிரும்மசாரியாக பட்டம் ஏற்றுக்  கொண்ட வருடம் இதைப் போல Pandemic  இருந்திருக்கிறது. அப்போது இருந்த கொள்ளை நோய் பெரிய அம்மை எனப்படும் ஸ்மால் பாக்ஸ். அந்தக் காலத்தில் அதற்கு தடுப்பூசியும் கிடையாது, மருந்தும் கிடையாது. மஹா பெரியவரின் குருவும், குருவுக்கு குருவும் அந்த நோய்க்குத்தான் பலியானார்கள்". என்றார்.  இந்த உலகம் சந்திக்காத பேரிடர்கள் இல்லை. அதையெல்லாம் தாண்டிதான் இன்னும் சுழன்று கொண்டிருக்கிறது.  என்ன? அப்பொழுது மீடியாவின் தாக்கம்  இல்லை. இந்த நோய்க்கு  இன்றைக்கு  இத்தனை பேர் பலியானார்கள் என்று திரும்ப திரும்ப அவை சொல்லிக் கொண்டிருக்கவில்லை. 

இன்று கொரோனா படுத்தும் பாடு ஒரு பக்கம் என்றால், அதைப்  பற்றி ஊடகங்களில் வரும் செய்திகள் படுத்தும் பாடு இருக்கிறதே அப்பப்பா! தடியெடுத்தவன் தண்டல்காரன் என்பது போல் அவரவர்  தங்களுக்கு தெரிந்ததையும், தெரியாததையும், அரைகுறையாக தெரிந்து கொண்டதையும் குறுஞ்செய்திகளாக அனுப்பித் தள்ளுகிறார்கள். எந்தவித ஆதாரமும்  இல்லாமல் தங்கள் குழப்பத்தையும், பயத்தையும் மற்றவர்களுக்கு கடத்துகிறார்கள். கொரோனாவை விட மோசம் இது. தங்கள் கையில் இருக்கும்  ஆயுதத்தின் பலம் தெரியாமல் விளையாடுகிறார்கள். கொளுத்தும் வெயிலையும், கொட்டும் மழையையும் கூட நல்ல மழை, நல்ல வெய்யில் என்று கூறுவதுதான் நம் மரபு. எந்த காலத்திலும் அவச்சொல் பேசக்கூடாது என்றுதான் நம் முன்னோர்கள் கூறுவார்கள். அப்படியிருக்க, நம்பிக்கை இழக்கும் படியாக பேசுவது தவறு என்றால் எழுதுவது மஹா தவறு. 

இதற்கு ஒரு மாற்றாக அமைந்தது ஞாயிறு அன்று திரு.ரங்கராஜ்  பாண்டே அவர்களோடு வீடியோ காண்ஃபிரென்சில் கலந்து கொண்டது. யங் திங்கர்ஸ் ஃபோரம்(young thinkers forum) என்னும் அமைப்பில் உறுப்பினராக இருக்கும் என் சகோதரியின் மகன் இந்த வீடியோ கான்ஃபிரென்ஸ் பற்றி தகவல் அனுப்பி அதில் கலந்து கொள்ள வேண்டுமென்றால் ரெஜிஸ்டர் செய்து கொள்ள சொன்னார். எனக்குதான் இதெல்லாம் பிடிக்குமே. ரிஜிஸ்ட்டர் செய்து கொண்டு ஆறேகாலுக்கு லாக் ஆன் செய்து காத்திருந்தேன். 

சாதாரணமாக பெரிய கம்பெனிகளின் சி.இ.ஓ.க்கள்தான்  இப்படி வெப் கான்ஃபிரென்சில் பேசுவார்கள். இப்போது நாம் சந்திக்கிறோம். என்று தொடங்கியவர் கொரோனா பற்றி பயமுறுத்தாமல் நம்பிக்கை அளிக்கும் விதமாக பேசினார். 

கொரோனாவால் பாதிப்புகள் இருந்தாலும் அதிலிருந்து மீண்டு வருபவர்கள் சதவிகிதம் அகில இந்திய அளவில் 24% என்றும் தமிழகத்தில் 50% என்றும் கூறினார்.  லாக் அவுட்டை அதிக நாட்கள் நீடிக்க முடியாது, என்னதான் நோய்த்தொற்று பயம் இருந்தாலும், வாழ்வாதாரம்  பாதிக்கப்படும் பொழுது நீண்ட நாட்கள் வீட்டில் இருப்பதை மக்கள் விரும்ப மாட்டார்கள். இதுவரை கொரோனாவிற்கு மருந்தும் கண்டுபிடிக்கப்படவில்லை, தடுப்பூசியும் இல்லை, மக்கள் கொரோனாவோடு வாழ கற்றுக் கொள்வார்கள் என்றார். 

சைனா அதன் நட்பு நாடுகள் உள்பட பல நாடுகளின் நம்பிக்கையை  இழந்து விட்டது. எனவே பல அந்நிய முதலீடுகள் இந்தியாவிற்கு கிடைக்கும் வாய்ப்பு உள்ளது, அதனால் வேலை வாய்ப்புகள் அதிகரிக்கும் என்றார்.  கல்வித் துறையிலும் நிறைய மாறுதல்கள் வரும். நாம் எல்லோரும் எதிர்ப்பார்க்காத, ஆச்சரியமூட்டும் இலவச அறிவிப்புகள் வருமாம்.  இந்தியாவின் எதிர்காலம் ப்ரகாசமாகவே இருப்பதாக கூறுகிறார். நம்பலாம்.  

வேறு சில காரணங்களாலும் நிலைமை மாறும், சீரடையும் என்றே நானும் நம்புகிறேன். நாடு முழுவதும் பலர் பிரார்த்தனை செய்கிறார்கள். நியாயமான பிரார்த்தனையை கடவுள் ஒரு போதும் மறுதலிக்க மாட்டார். நிச்சயம் நல்லது நடக்கும். வாழிய நலம்.