நாளாம் நாளாம் பிறந்த நாளாம்நாளாம்

நாளாம் நாளாம் 
பிறந்த நாளாம் 

பேத்தியின் பிறந்தநாளுக்கான அலங்காரங்கள்

பிறந்த நாள் கொண்டாட்டங்களுக்கு சிறு வயதில் ஆசைப்பட்டதுண்டு. அப்பொழுதெல்லாம் யாரும் வாழ்த்து கூறியதில்லை. சீனியர் சிட்டிசனாகி, பிறந்தநாள் கொண்டாட்டங்களில் ஆசை போன பிறகு முக நூல், மெசன்ஜர், வாட்ஸாப் என்று பல வழிகளில் வாழ்த்து மழை!

எங்கள் வீட்டில் பெரும்பான்மை-யோர்களின் பிறந்த நாள்கள், திருமணநாள்கள் எல்லாமே ஜுன், ஜுலையில்தான் வரும். ஆனி கொண்டாட்டம்!

இந்த வருடம் சனிக்கிழமையன்று என்னுடைய பிறந்தநாள் வந்ததால் ப்ராம்டன் என்னும் இடத்தில் இருக்கும் குருவாயூரப்பன் கோவிலுக்குச் செல்லலாம் என்று நினைத்தோம். அதற்கு முக்கிய காரணம் சமீபத்தில்தான் நான் நாராயணீயம் கற்றுக் கொண்டேன். எனவே குருவாயூரப்பனை தரிசிக்க விரும்பினேன். 

ப்ராம்டனில் இருக்கும் குருவாயூரப்பன் கோவில் கேரள பாணியில் அமைந்திருக்கும் சிறிய அழகான கோவில், நன்றாக பராமரிக்கப்படுகிறது. கோவிலுக்கு உள்ளே நுழைந்ததும் பிரதானமாக குருவாயூரப்பன் சன்னதி. குருவாயூரில் இருப்பது போல குழந்தை கிருஷ்ணனாக இல்லாமல் சற்று பெரிய குழந்தையாக இருக்கிறார் அதற்கு எதிர் எதிரே துலாபாரம் பிரகாரத்தை சுற்றி வரும் பொழுது விநாயகர் ஐயப்பன் பகவதி சன்னதிகள்.

கோவிலில் இருந்து ஒரு நண்பர் வீட்டிற்கு சென்றோம் அங்கிருந்து அவர்கள் குடும்பத்தோடு நயாகரா சென்றுவிட்டு, அங்கிருந்து நயாகரா பை தி லேக்ஸ் ஒரு பெரிய ஏரியை ஒட்டி இருக்கும் பார்க்கிற்கு சென்றோம். அந்த பார்க்கிலிருந்து பார்க்கும் பொழுது ஒரு கட்டிடம் தெரிந்தது அது அமெரிக்காவை சேர்ந்ததாம் ஒருமுறை அமெரிக்காவிற்கும் கனடாவிற்கும் யுத்தம் வந்த பொழுது அமெரிக்க துருப்புகள் அந்த கட்டிடத்தில் இருந்தும் கெனடிய துருப்புகள் அருகில் இருக்கும் மிசிசாக போர்ட் என்னும் இடத்தில் இருந்தும் யுத்தம் செய்தனவாம்.

 

அதற்கு அருகில் குயின்ஸ் ஸ்ட்ரீட் என்ற ஒரு இடம் அது பழங்கால கனடா. தெருவின் இரண்டு புறங்களிலும் வரிசையாக கடைகள் அவைகளை பார்வையிட்டோம் ஐஸ்கிரீம் சாப்பிட்டோம் ஆனால் எனக்குத் தான் கடுமையான தலைவலி இவர்கள் என்னதான் கோடை என்று சொல்லிக் கொண்டிருந்தாலும் இத்தனை நாட்களாக எனக்கு கோடை போல தோன்றவில்லை. வீட்டிற்குள் ஏசி ஓடிக் கொண்டிருந்ததால் நான் வெப்பத்தை உணரவில்லை அன்றுதான் வெளியே சென்றோம் பளிச்சென்று வெயில் இத்தனை நாட்களாக குளிர் குளிர் என்று சொல்லிக் கொண்டிருந்துவிட்டு திடீரென்று வெயிலுக்கு எக்ஸ்போஸ் ஆனதில் ஒத்துக் கொள்ளவில்லை போலிருக்கிறது கடுமையான தலைவலி வந்துவிட்டது அதனால் நாங்கள் சீக்கிரம் நண்பர் வீட்டிற்கு வந்து விட்டோம் அங்கு வந்ததும் இரண்டு பாரசிட்டமால் போட்டுக் கொண்டேன். அதனால் புகைப்படம் எடுக்க மூட் இல்லை.

குயின்ஸ் ஸ்ட்ரீட்டில் குதிரை பூட்டிய சாரட் வண்டிகள் இருந்தன குதிரை என்றால் அதுதான் குதிரை, நமீதா போல. எலும்பும்,தோலுமாக இருக்கும் நம்ம ஊர் சோப்ளாங்கி குதிரைகளை பார்த்துவிட்டு அந்த குதிரைகளை பார்த்தால் வியப்பாக இருந்தது.

அங்கிருந்து நண்பர் வீட்டிற்கு வரும் வழி முழுவதும் திராட்சை தோட்டங்கள் மற்றும் ஒயின் தயாரிக்கும் கூடங்கள் நயாகரா ஒயின் மிகவும் பிரசித்தி பெற்றதாம் அங்கு இருக்கும் ஒயின் தயாரிக்கும் தொழிற்சாலைகளை சுற்றிப் பார்ப்பதையே ஒரு டூராக அரேஞ்ச் பண்ணி தருவார்களாம் அந்த சமயத்தில் ஒயினை சுவைத்துப் பார்க்கலாமாம். 

என் பிறந்தநாளுக்கு என் மகள் மேங்கோ கோக்கனட் பை செய்திருந்தாள், நன்றாக இருந்தது. ஒரு திங்கள் அன்று பகிர எண்ணி இருக்கிறேன். இரண்டு பேத்திகளும் அவர்களாகவே பர்த்டே கார்டு வரைந்து கொடுத்தார்கள். சர்ப்ரைஸாக எனக்கு தர வேண்டும் என்பதால் அவர்கள் அதை தயாரிக்கும் வரை என்னை ஹாலுக்கு வர விடவில்லை:))

கூகுள் உதவியோடு தமிழிலும் வாழ்த்து :))

அடுத்த நாள் சாயிபஜனைக்கு சென்று விட்டு வரும் பொழுது சங்கீதாவிற்கு நான் அவர்களை அழைத்துச் சென்றேன். சாப்பாடு நன்றாக இருந்தது அதை பரிமாறிய தமிழ் பேசிய இரண்டு இளம் பெண்களும் நன்றாக இருந்தார்கள் கல்லூரி மாணவிகளாக இருக்கும் என்று நினைக்கிறேன். 

இப்படியாக என் பிறந்தநாள் கொண்டாட்டம் நடைபெற்றது பேத்திக்கு ஜூலை 15 பிறந்தநாள் அன்று ஒர்க்கிங் டேயாக இருப்பதால் சனிக்கிழமை அதாவது ஜூலை 12 அவை அவளுக்கு நெருக்கமான சில தோழிகளை அழைத்திருந்தாள். மகள் விருப்பப்படி வீட்டில் என் மகள் செய்த டபுள் லேயர் கேக் கட் பண்ணினார்கள். பலூன் அலங்காரம் எல்லாம் என் மகளேதான் செய்திருந்தாள்.

பர்த் டே தீம் வாட்டர். அதனால் அவள் தன் தோழிகளோடு பக்கத்தில் இருந்த splash padல் விளையாடி விட்டு வந்தனர். கேக் கூட நீல நிறத்தில் வேண்டுமென்றாள். குழந்தைகளுக்கு கேக்கோடு சிப்ஸ் ஜூஸ் பீட்சா, வெஜிடபிள் சாலட் வித் ராஞ்ச் போன்றவை வழங்கப்பட்டன. தனக்கு பரிசாக வந்த லேகோ பிளாக்ஸ்களை வைத்து என் பேத்தி செய்திருந்த மயில்.

மயிலாசனம் - ஆசனத்தில் அமர்ந்திருக்கும் மயில்