ஒரு ஊரின் கதை
இரண்டு மூன்று வாரங்களுக்கு முன்பு திரு.துரை செல்வராஜூ அவர்களின் 'அந்த காலத்துல' என்னும் கதை எங்கள் பிளாகில் பிரசுரமாகியிருந்தது. அதில் வளர்ச்சி என்ற பெயரில் நம் ஊர்கள் எப்படி பாழடிக்கப்படுகின்றன என்று ஆதங்கப் பட்டிருந்தார். அதற்கு தில்லையகத்து கீதா தன்னுடைய பின்னூட்டத்தில்,"வளர்
என் கணவர் 1979இல் அங்கு சென்ற பொழுது பாலைவனம் என்றால் பாலைவனம்தான். எங்கும் மொட்டையாக நிற்கும் மலைகளும், மணலும்தானாம். ஏன் நான் 1987 அங்கு சென்ற பொழுது கூட சில முக்கியமான சாலைகளைத் தவிர பெரும்பான்மையான சாலைகள் கச்சா ரோடாகத்தான் இருந்தன. அப்போதுதான் அல் குவைர் எனப்படும் குடியிருப்பு பகுதி உருவாக ஆரம்பித்தது. அப்போதெல்லாம் அங்கிருந்த பி.ஹெச்.எஸ். எனப்படும் ஒரு வட்ட வடிவ கட்டிடம், ஐஸ் ஸ்கேட்டிங் ரிங் எனப்படும் போன்றவை அடையாளங்கள். நாளடைவில் அல்-குவைர் பிரம்மாண்டமாக வளர்ந்து விட்ட பிறகு இவை இருக்கும் இடம் தெரியவில்லை.
அதைப் போலத்தான் வாடி கபீர் என்னும் இடமும். ஆரம்பத்தில் வெறும் கச்சா ரோடாக இருந்த இடத்தில் இருட்டிய பிறகு செல்வதற்கு பயப்படுவார்களாம். ஓரளவு வளர்ந்த பிறகு கூட நெருப்புத் துண்டுகளாக ஜொலிக்கும் கண்களோடு நரிகள் ஓடுவதை பார்த்திருக்கிறேன். பின்னர் அந்த இடம் எப்படிப்பட்ட அழகான,பாதுகாப்பான இடமாக மாற்றப்பட்டது!
ஆரம்பத்தில் அங்கு ரியாம் பார்க் என்று ஒரு பார்க் மட்டுமே நகருக்குள் உண்டு. கொஞ்சம் தள்ளி நசீம் கார்டன் என்று ஒரு இடம் உண்டு. அங்குதான் விடுமுறை நாட்களில் பிக்னிக் செல்வோம். நாளடைவில் வாடி கபீர் பார்க், டார்செய்ட் பார்க்,கல்பூ பார்க், குரம் என்னும் இடத்தில் மிகப் பெரிய ரோஸ் கார்டன். விதம் விதமான ரோஜாக்களை அந்த பாலைவனத்தில் பூக்க வைத்தார்கள். அங்கு ஒரு செயற்கை நீர் வீழ்ச்சி வேறு உண்டு. விடுமுறை நாட்களில் மியூஸிக்கல் பவுண்டன் உண்டு.
அதே போல பீச் என்றால் மத்ரா என்னும் இடத்தில் இருந்த கார்னிஷ்தான். அங்கு சமுத்திரத்தில் இறங்கி காலை நனைக்க முடியாது. பேவ்மெண்ட்டில் நடக்கலாம், ஆங்காங்கே போடப்பட்டிருக்கும் பெஞ்சுகளில் உட்காரலாம். விடுமுறை நாட்களில் கண்டாப் என்னும் இடத்திற்குச் செல்வோம். அங்கு போட்டிங் போகலாம். மற்றபடி பெரிதாக எதுவும் கிடையாது. அழ-ஸவாதி என்னும் பீச்சிற்கும் பிக்னிக் செல்வதுண்டு. அங்கு கடலுக்கு நடுவில் அமைந்திருக்கும் ஒரு திட்டிற்குச் சென்று, கையில் கொண்டு சென்றவற்றை சாப்பிட்டு விட்டு வருவோம். அந்தக் கடலில் ஜெல்லி பிஷ் நிறைய இருக்கும். என்பதால் காலை நனைக்க பயமாக இருக்கும். ஒரு முறை பிக்னிக் சென்றபோது நிறைய பேருக்கு காலில் ஜெல்லி பிஷ்ஷின் முட்கள் அடையாக அப்பிள் கொள்ள, அதை மருத்துவரிடம் சென்று எடுக்க வேண்டியதாக போய் விட்டது. அதெல்லாம் அந்தக் காலம், 2000குப் பிறகு அந்த பீச்சை வெகு அழகாக மாற்றி விட்டார்கள்.
எட்டி பீச் என்றொரு இடம் உண்டு. தொன்னூறுகளின் இறுதியில் அப்படி ஒரு இடம் இருக்கிறது என்று கேள்விப்பட்டு நண்பர்களோடு அங்கு சென்ற பொழுது அது ஒரு பயமுறுத்தும் அனுபவமாக இருந்தது. ஏனென்றால் ஒரு குறிப்பிட்ட தூரம் வரைதான் நல்ல பாதை, அதன் பிறகு மேடும், பள்ளமும், சரளைக் கற்களும், வண்டி குதித்து குதித்து, குழந்தைகள் பயந்து விட்டார்கள். நாங்களும்தான், எங்கேயாவது வண்டி பஞ்சராகிவிடப் போகிறதே என்று நடுக்கம். ஆனால் ஒரே வருடத்திற்குள், அருமையான பாதி அமைத்து விட்டார்கள். பீச்சும் வெகு அழகு. வின்டரில் பல நாடுகளிலிருந்தும் பல அபூர்வ பறவைகள் வரும்.
இவைகளைத் தவிர இன்டர் கான்டினென்டல் பீச், குரம் பீச் போன்ற நகருக்குள் இருந்த கடற்கரைகளில் , வாக்கிங் போவதற்கு நடைபாதை அமைத்து மிகவும் அழகாக்கி விட்டார்கள். அங்கெல்லாம் சிறிய காபி கடைகள் உண்டு, ஆனால் அவற்றில் அடுப்பில் எண்ணெய் சட்டியை வைத்து எதையும் பொரிக்க அனுமதி கிடையாது. எண்ணெய் வாடை சுற்றுப்புறத்தை பாழ் படுத்திவிடக் கூடாது என்பதுதான் காரணம். அங்கு செல்லும் போதெல்லாம் எனக்கு நம்முடைய மெரீனா பீச் நினைவுக்கு வரும். எத்தனை அழகான கடற்கரை!ஆனால்...?
ஸீப்(Seeb) என்னும் கடற்கரை சாலைக்குச் சென்றால் வெகு அழகான பங்களாக்களை காண முடியும். நவம்பரிலிருந்து பிப்ரவரி வரை ஓமானுக்கு வருகை தரும் டால்ஃபின்களை காண சிதாப் என்னும் பீச்சிலிருந்து படகில் அழைத்துச் சென்று நடுக்கடலில் முக்கால் மனை நேரத்திற்கும் மேல் நிறுத்துவார்கள். நமக்கு லைஃப் ஜாக்கெட் தருவார்கள்,அதை அணிந்து கொண்டு விருப்பப்பட்டால் கடலில் குளிக்கலாம். ஆனால் நம் ஊர்க்காரர்கள் டிபன் பாக்ஸை திறந்து விடுவோம். ஐரோப்பியர்கள்தான் குளிப்பார்
இந்த சிதாப் பீச்சில் கந்தசாமி படத்தில் வரும் "எக்ஸ்க்யூஸ் மீ மிஸ்டர் கந்தசாமி.." பாட்டு படமாக்கப்பட்டிருக்கிறது. பீமா படத்தில் ஒரு பாடல்(விக்ரம்,திரிஷா) ஸீப் பீச்சில் படமாக்கப்பட்டதாக சொன்னார்கள்.
ஒரு கிராமமாக இருந்த ஸீப், பொட்டலாக இருந்த காலா(Ghala) என்னும் இடங்களையெல்லாம் மிகவும் சிறப்பாக,அழகாக மாற்றி விட்டார்கள். அங்கெல்லாம் ஒரு இடத்தை நிர்மாணிக்கும் பொழுதே வாட்டர் கனெக்ஷன், ட்ரைனேஜ், டெலிபோன், மற்றும் மின்சார இணைப்புகளையும் முடித்து விடுவார்கள். அதனால் ஒவ்வொன்றிற்கும் தனித்தனியாக தோண்டும் வேலை கிடையாது.
நம் நாட்டின் மக்கள்தொகை, மக்களின் ஒத்துழையாமை, ஊழல் போன்றவை நம் தேசத்தின் அழகை குலைக்கின்றன.
பி.கு.: என்னிடம் இருந்த புகைப்படங்களை தேட முடியாததால் இணையத்திலிருந்து எடுத்து போட்டிருக்கிறேன்.
